අංශභාගය රෝගී තත්වය සුව කිරීම සම්බන්ධ සමාජ ජාලා සටහන් පිළිබද පැහැදිලි කිරීමක් 

දිනපතා සත්‍ය කරුණු දැන ගැනීමට අපගේ WhatsApp චැනලයටමෙතනින් එකතුවන්න.

විවිධ අසත්‍ය තොරතුරු සමාජ මාධ්‍ය පරිශීලකයින් නොමඟ යවමින් නිරන්තරයෙන් ම සංසරණය වන අතර මේ දිනවලත් එවැනි ව්‍යාජ පණිවිඩයක් සමාජ මාධ්‍ය ඔස්සේ සංසරනය වෙමින් පැවති නිසා ඒ පිළිබඳ කරුණු පරීක්ෂා කිරීමට අප තීරණය කරනු ලැබුවා.

සමාජ මාධ්‍ය සටහන් (Social Media)

මුම්බායි හි පරෙල් හි KEM රෝහලේ අංශභාගය ඇති රෝගීන් රෝගය වැළඳී පැය 24ක් ඇතුළත මෙම රෝහලට රැගෙන ආවොත් ස්වයංක්‍රීය යන්ත්‍රයක් හරහා මෙම රෝගයෙන් සුව කළ හැකි බවත්, මෙම ඇන්ජියෝප්ලාස්ටි වැනි යන්ත්‍රය ආධාරයෙන් රෝගියාගේ මොළයේ ගෙඩි ඉවත් කරන බවත් සමාජ මාධ්‍ය ඔස්සේ සටහනකින් පළ කර තිබුණා.

මෙම පහසුකම ඉන්දියාවේ ප්‍රථම වරට මෙම රෝහලේ ඇති බවත්,  එවැනි යන්ත්‍ර ඇත්තේ ලෝකයේ නිශ්චිත ස්ථාන කිහිපයක පමණක් බවත් මෙම සටහනේ වැඩිදුරටත් සඳහන් කර තිබුණා.

මීට අමතරව උපතින්ම බිහිරි සහ ගොළු දරුවන්ට කර්ණශේරුකා බද්ධ කිරීමේ ශල්‍යකර්මයකින් එම ආබාධිත දරුවා සුවපත් කිරීමට හැකියාව පවතින බවත්, එම සැත්කම සඳහා ලක්ෂ 10 සිට 12 දක්වා වැය වන බවත්, නමුත් Rotary Club of Bombay Worli, District 3141 සහාය ඇතිව මෙම සැත්කම මුම්බායි හි SRCC රෝහලේදී නොමිලේ සිදු කෙරෙන බවත් එම සටහනේ සඳහන්ව තිබුණේ මේ අයුරින්.

Fb|Archive

මෙම සටහන ම වට්ස් ඇප් හරහා ද සංසරණය වී තිබුණේ මේ අයුරින්,

Fact Check (සත්‍ය තොරතුරු විමර්ශනය කිරීම) :

යම් රෝගයක් වැළඳුනු විට එම රෝගියා සහ රෝගියාගේ පවුලේ සාමාජිකයින් නිරන්තරයෙන් උත්සහ ගනු ලබන්නේ එම රෝගියා සුව කර ගැනීමටයි. එබැවින් කුමන රටක හෝ යම් රෝගයක් සම්පූර්ණයෙන් ම සුව කිරීමක් සිදුකරන බවට සඳහන් තොරතුරක් ලදහොත් මුදල් වැය වුණ ද උත්සහ කරන්නේ රෝගය සුව කර ගැනීමටයි.

අංශභාග රෝගය පැය කිහිපයකින් සුව කළ හැකි ද?

අනුව සමාජ මාධ්‍ය ඔස්සේ සංසරණය වී තිබුණු තොරතුරු අනුව අංශභාගය රෝගී තත්වය සුව කිරීමේ හැකියාව පවතින රෝහල ඉන්දියාවේ එකකි.

එබැවින් සමාජ මාධ්‍ය සටහන්වල දැක්වෙන ඉන්දියාවේ මුම්බායිහි පරෙල්හි KEM රෝහලේ අංශභාගය සහිත රෝගීන් සුව කළ හැකි යන්ත්‍රයක් පවතින්නේ ද යන්න පිළිබඳවත්, ඉන් අංශභාග රෝගීන් සුව කිරීමේ හැකියාව පතින්නේ ද යන්න පිළිබඳවත් අප සොයා බැලීමක් සිදුකළා.

ඒ අනුව මෙම තොරතුරට හේතු වී ඇති සිදුවීම සම්බන්ධ පුවතක් 2018 වසරේ ඔක්තෝබර් 11 වන දින The Hindu වෙබ් අඩවිය පළ කර තිබුණා.

එම පුවතේ සිරස්තලය ලෙස සඳහන්ව තිබුණේ, “ KEM රෝහලට උසස් ආඝාත මධ්‍යස්ථානයක් ලැබේ ” යනුවෙන්.

සමාජ මාධ්‍ය සටහනේ සඳහන් කර තිබෙන ‘KEM’ රෝහලේ ප්‍රධාන ස්නායු ශල්‍ය වෛද්‍යවරයා වන වෛද්‍ය නිතින් ඩැන්ගේ මේ පිළිබඳව සිදුකළ පැහැදිලි කිරීමක් ප්‍රවෘත්ති වාර්තාවේ අඩංගු වී තිබුණා.

ඒ අනුව වෛද්‍යවරයා පවසන්නේ, ආඝාතයෙන් පෙළෙන රෝගීන්ගෙන් බහුතරයක් ප්‍රමාද වී රෝහලට ළඟා වන අතර, ප්‍රතිකාර සඳහා සුළු අවස්ථාවක් ඉතිරි වන බවයි. එබැවින් ආඝාතයකින් පසු පළමු පැය 24 තුළ පැමිණෙන රෝගීන්ට පමණක් මෙම ආඝාත මධ්‍යස්ථානයෙන් උපකාර කළ හැකි බව වෛද්‍යවරයා පවසා තිබෙනවා. 

එමෙන් ම 2018 වසරේ නොවැම්බර් 3 වන දින මුම්බායි මිරර් වෙබ් අඩවියේ හි ද මෙම ව්‍යාජ සමාජ මාධ්‍ය සටහන සම්බන්ධයෙන් සවිස්තරාත්මක කරුණු පරීක්ෂා කිරීමක් සිදුකර තිබුණු ආකාරය අපට දැකගත හැකි විය.

එම වාර්තා කිරීමේ ද පැහැදිලිවම සඳහන්ව ඇත්තේ, ආඝාතයකින් පසු පළමු පැය 24 තුළ රෝගීන්ට පමණක් උපකාර කළ හැකි බවත් පැරණි රෝගීන්ට ප්‍රතිකාර කිරීම සඳහා භාවිතා කළ නොහැකි බවත් KEM රෝහලේ ප්‍රධාන ස්නායු ශල්‍ය වෛද්‍යවරයා වන වෛද්‍ය නිතින් ඩැන්ග්  පැහැදිලි කළ බවයි.

මෙම ලිපියේ වැඩිදුරටත් සඳහන් වන්නේ, ඇන්ජියෝග්‍රැෆි නව යන්ත්‍රය රුපියල් කෝටි 8.5 කට KEM රෝහල මිලදීගෙන ඇති අතර එම යන්ත්‍රයෙන්, ආඝාතය ඇති වී පළමු පැය 24ක් තුළ ධමනි හෝ නහරයකින් රුධිර කැටියක් ඉවත් කිරීමෙන් රෝගියෙක්ට සුවය ලබාදිය හැකි බවයි. 

මෙම පණිවිඩය හුවමාරු වීමෙන් පසු, වසර ගණනාවක් අංශභාගය රෝගයෙන් පෙළෙන රෝගීන් බොහෝමයක් තම තත්වය සුව කරගත හැකි බවට වැරදි වැටහීමක් ඇති කරගෙන තිබෙන අතර අංශභාගයෙන් වසර ගණනාවක් පීඩා විඳින රෝගීන් විශාල සංඛ්‍යාවක් මෙම රෝහලට ප්‍රතිකාර සඳහා ද පැමිණ තිබෙනවා. 

2018 වසරේ සිට මේ දක්වා ම වරින් වර ඉදියාව පුරා මෙන් ම වෙනත් රටවල ද මේ සම්බන්ධව නොමඟ යවන සුළු පුවත් හුවමාරු වී ඇති අතර මේ සම්බන්ධව 2020 වසරේ ද ඉන්දියාවේ සිදුකළ කරුණු පරීක්ෂා කිරීමක් අපට හමු විය. එම කරුණු පරීක්ෂණය තුළ වෛද්‍ය නිතින් ඩැන්ගේ ලේකම් හීනා ෂෙයික් මහත්මිය සම්බන්ධ කර ගනිමින් ද කරුණු විමසා තිබෙනවා.

ඒ අනුව ඇය පවසා ඇත්තේ පසුගිය වසර දෙකේ සිට මෙම පණිවිඩය පුළුල් ලෙස හුවමාරු වී ඇති බවයි. නමුත්, ඕනෑම රෝගියෙකු අංශභාගයෙන් සුව කළ නොහැකි බවත්, ආඝාතය ආරම්භයේ සිට පැය 24 ක් ඇතුළත රෝගියෙකු සුව කිරීමට උත්සාහ කළ හැකි බවත් එම මහත්මිය පවසා තිබෙනවා. එමෙන් ම ඒ සඳහා පැය 6ක කාලයක් ගතවන බවත් එම මහත්මිය පවසා තිබෙනවා.

2024 වසරේ ද මෙම නොමඟ යවන සුළු පණිවිඩය හුවමාරු වී ඇති අතර ඒ පිළිබඳව සිදුකළ කරුණු පරීක්ෂා කිරීමක් මෙතනින්.

ස්නායු රෝග පිළිබඳ විශේෂඥ වෛද්‍ය පද්මා එස්. ගුණරත්න

“ආඝාතයට CT සහ Digital Subtraction Angiography යන්ත්‍ර වැනි තාක්ෂණය සහ පුහුණු වෛද්‍ය විශේෂඥයින්ගේ විශේෂඥතාව ඇතුළත් කාලය මත රඳා පවතින හදිසි ප්‍රතිකාර අවශ්‍ය වේ. එයට ත්‍රොම්බොලිටික් වැනි මිල අධික ඖෂධ සහ කැතීටර් වැනි ද්‍රව්‍ය ද අවශ්‍ය වේ. හදිසි කළමනාකරණය සඳහා රෝගීන් ඉන්දියාවට රැගෙන යාමට නොහැකි බැවින් බෙදා හරින ලද පණිවිඩය ශ්‍රී ලංකාවට අදාළ නොවේ.
එබැවින්, රෝග ලක්ෂණ ආරම්භ වී පැය කිහිපයක් ඇතුළත උග්‍ර ආඝාත රෝගියෙකු වහාම එම රෝගියා CT පහසුකම් සහිත ළඟම ඇති ප්‍රමුඛ රෝහල වෙත රැගෙන යා යුතුයි.”

අංශභාගය ඇතිවන්නේ ඇයි?

අංශභාගය ඇතිවන්නේ ස්නායු පද්ධතිය ආශ්‍රිතව හටගන්නා ගැටලුකාරී තත්ත්වයක් නිසායි.සාමාන්‍යයෙන් මොලය මගින් ඇතිකරන සංනිවේදනයන් සිරුර  හරහා මාංශපේශි වෙත ගමන්කර විවිධ කායික ක්‍රියාකාරකම් සහ ප්‍රතිචාර ජනනය කරන්නේ ස්නායු පද්ධතිය හරහායි.මොලය/ස්නායු පද්ධතියේ හෝ මාංශ පේශි වල අඩපණ වීමක් මගින් අංශභාග තත්ත්වයන් ඇතිවිය හැකියි. මුලිකවම මොලයට රුධිරය සපයන රුධිරවාහිනී තුල ලේ /මේද කැටි සිරවීමෙන් මොලයට අවශ්‍ය රුධිරය නොලැබී අඩු ඔක්සිජන් සහ පෝෂක ප්‍රමාණයක් මොලයට ලැබීම නිසා මොලය අඩපණ වීමෙන් ඇතිවන  Stroke  තත්ත්වයක් මෙන්ම සුසුම්නාවට  ඇතිවන එවැනි තත්ත්වයන් ඔස්සේ අංශභාග  තත්ත්වයන් ඇතිවිය හැකියි. ඒ සම්බන්ධ විස්තර කියවිය හැකියි මෙතනින්

අංශභාග තත්ත්වයන් ඇතිවන්නේ ඇයි ?එයට හේතු මොනවාද ? ඒ සම්බන්ධ විස්තරාත්මක වීඩියෝවක් පහතින්. 

ආඝාතය පිළිබඳ අනතුරු ඇඟවීමේ සලකුණු :

මුහුණේ හදිසි හිරිවැටීම හෝ දුර්වලතාවය.
කොඳු ඇට පෙළේ ආඝාතය
විශේෂයෙන්ම ශරීරයේ එක් පැත්තක අතේ හෝ පාදයේ වේදනාව
හදිසි ව්‍යාකූලත්වය
ඉන්ටර්කොස්ටල් ස්නායු අවහිර කිරීම
මාංශ පේශි ඩිස්ට්‍රොෆි
හදිසියේ ඇවිදීමට අපහසු වීම
මෝහනය
සමබරතාවය හෝ සම්බන්ධීකරණය නැතිවීම
කතා කිරීමේ හෝ තේරුම් ගැනීමේ ගැටළු
හදිසි හෝ දරුණු හිසරදය
ඔක්කාරය හා වමනය
කම්පනය
පෞරුෂයේ පැහැදිලි කළ නොහැකි වෙනස්කම්
අසාමාන්‍ය අමතක වීම
දුර්වල විනිශ්චය
හදිසියේම එක් ඇසක් හෝ දෙකම පෙනීමේ අපහසුව

රෝග වැළැක්වීම සෑම විටම සුව කිරීමට වඩා හොඳය. සෞඛ්‍ය සම්පන්න ජීවන රටාවක් වෙනස් කිරීමෙන් ආඝාත අවදානම අවම කර ගැනීමට උපකාරී වේ:

රුධිර පීඩනය සාමාන්‍ය පරාසයක් පවත්වා ගන්න
දුම් පානය නොකරන්න
රුධිර සීනි (ග්ලූකෝස්) සාමාන්‍ය මට්ටමක් පවත්වා ගන්න
ඔබේ කොලෙස්ටරෝල් මට්ටම සාමාන්‍ය පරාසයක තබා ගන්න
ඔබේ බර අඩු කරන්න
ක්‍රියාශ්‍රීලි වෙන්න
සෞඛ්‍ය සම්පන්න ආහාර අනුභවය
ව්‍යායාම් වල යෙදෙන්න

ප්‍රතිකාර තීරණය කිරීම සඳහා රෝග විනිශ්චය පරීක්ෂණ මොනවාද?

ස්නායු රෝග පරීක්ෂණය
ආඝාතයේ වර්ගය, ස්ථානය සහ ප්‍රමාණය තේරුම් ගැනීමට මොළයේ රූප පරීක්ෂණ (CT, හෝ පරිගණක ගත ටොමොග්‍රැෆි ස්කෑන්; MRI, හෝ චුම්භක අනුනාද රූප).
රුධිර ප්‍රවාහ සහ රුධිර වහනය වන ස්ථාන (කැරොටයිඩ් සහ ට්රාන්ස්ක්රේනියල් අල්ට්රා සවුන්ඩ් සහ ඇන්ජියෝග්රැෆි) පෙන්වන පරීක්ෂණ.
රුධිර වහනය හෝ කැටි ගැසීමේ ආබාධ සඳහා රුධිර පරීක්ෂණ.
EKG (electrocardiogram) හෝ හදවතේ අල්ට්රා සවුන්ඩ් පරීක්ෂණයක් (echocardiogram) මොළයට ගමන් කළ හැකි රුධිර කැටි ගැසීමේ හෘද ප්‍රභවයන් හඳුනා ගැනීම.
මානසික ක්‍රියාකාරීත්වය මනින පරීක්ෂණ.

ආඝාත ප්‍රතිකාර

ක්ෂණික වෛද්‍ය ප්‍රතිකාර වැදගත් වේ. නව ප්‍රතිකාර ක්‍රියාත්මක වන්නේ ආඝාතයක් ආරම්භ වී පැය කිහිපයක් ඇතුළත ලබා දෙන්නේ නම් පමණි. නිදසුනක් වශයෙන්, රුධිර කැටි ගැසීමේ ඖෂධයක් පැය තුනක් ඇතුළත ලබා දිය යුතුය.

වෛද්‍යවරයා රෝග විනිශ්චය පරීක්ෂණ සම්පූර්ණ කිරීමෙන් පසුව, ප්‍රතිකාරය තෝරා ගනු ලැබේ. සියලුම ආඝාත රෝගීන් සඳහා, තවදුරටත් මොළයට හානි වීම වැළැක්වීම මෙහි අරමුණයි. මොළයට රුධිර ප්‍රවාහය අවහිර වීමෙන් ආඝාතය ඇති වුවහොත්, ප්‍රතිකාර සඳහා ඇතුළත් විය හැකිය.

TPA (පටක ප්ලාස්මිනොජන් සක්‍රියකාරකය), රුධිර කැටි ගැසීමේ ඖෂධයක් වන අතර එය රුධිර වහනය නොවන ආඝාතයක් ආරම්භ වී පැය තුනක් ඇතුළත එන්නත් කරනු ලැබේ.
ප්‍රතිදේහජනක (වෝෆරින්) සහ ප්‍රති-පට්ටිකා ඖෂධ (ඇස්ප්‍රින් හෝ ටික්ලොපිඩින්) ඇතුළු රුධිරය තුනී කරන ඖෂධ; ඇස්පිරින් සහ තිරසාර මුදා හැරීමේ ඩයිපිරිඩමෝල් සංයෝගයකි.
පටු වූ බෙල්ලේ රුධිර නාලවල අභ්‍යන්තරය විවෘත කරන ශල්‍යකර්මය (කැරොටයිඩ් එන්ඩාටෙරෙක්ටෝමි).

රුධිර වහනය ආඝාතය ඇති කරයි නම්,

සාමාන්‍ය රුධිර කැටි ගැසීම පවත්වා ගෙන යන ඖෂධ.
මොළයේ රුධිරය ඉවත් කිරීම හෝ මොළයේ පීඩනය අඩු කිරීම සඳහා ශල්‍යකර්ම
කැඩුණු රුධිර වාහිනී සවි කිරීම සඳහා ශල්‍යකර්ම
දඟරයක් ඇතුල් කිරීමෙන් රුධිර වහනය වන යාත්‍රා අවහිර කිරීම.
මොළයේ ඉදිමීම වළක්වන හෝ ආපසු හැරවීමට ඖෂධ.
පීඩනය අඩු කිරීම සඳහා මොළයේ හිස් කොටසකට නලයක් ඇතුල් කිරීම.

ආඝාතයෙන් පසු පුද්ගලයෙකුට යම් ආබාධයක් ඇති විය හැක. ආබාධිතභාවය ආඝාතයේ ප්‍රමාණය හා ස්ථානය මත රඳා පවතී. මොළයේ දකුණු පැත්ත ශරීරයේ වම් පැත්ත පාලනය කරයි; දක්ෂිණාංශික පුද්ගලයින් තුළ අවධානය සහ දෘශ්‍ය අවකාශීය කුසලතා සඳහා වැදගත් වේ. මොළයේ වම් පැත්ත ශරීරයේ දකුණු පැත්ත පාලනය කරයි; දක්ෂිණාංශික පුද්ගලයන් තුළ (සහ වම් අත මිනිසුන්ගෙන් සියයට 50 ක්) එය භාෂාව කතා කිරීම සහ අවබෝධය පාලනය කරයි. භාෂා ආබාධ “ඇෆාසියා” ලෙසද හැඳින්වේ.

මේ සම්බන්ධයෙන් පළ වූ ලිපියක් මෙතනින්.

අංශභාගය – සුව කිරීම 

 අංශභාගය සෑම අවස්ථාවකම සුව කළ නොහැක. කෙසේ වෙතත්, රෝගයේ හේතුව සහ වර්ගය අනුව, සමහර පුද්ගලයින්ට අර්ධ හෝ සම්පූර්ණ සුවයක් අත්විඳිය හැකිය. තාවකාලික අංශභාගය ඇති අවස්ථාවන්හිදී, වෛද්‍ය ප්‍රතිකාර නොමැතිව රෝග ලක්ෂණ තනිවම පහව යා හැකිය. නමුත් දරුණු තත්වයන් සඳහා මෙය එසේ නොවිය හැකිය.

අංශභාගය සඳහා දියුණු ප්‍රතිකාර විකල්ප ගවේෂණය කිරීම වෛද්‍යවිද්‍යාව තුළ සිදුවනු ලැබේ. සුෂුම්නා බද්ධ කිරීම් සහ විද්‍යුත් උත්තේජනය, Stem Cells  චිකිත්සාව, BCIs, වැනි අංශභාග පර්යේෂණවල සැලකිය යුතු ප්‍රගතියක් ලබා ඇතත්, සම්පූර්ණ සහ විශ්වීය ප්‍රතිකාරයක් තවමත් නොපැහැදිලි ය. අඛණ්ඩ අධ්‍යයනයන් සහ සායනික අත්හදා බැලීම් අංශභාගයෙන් පීඩාවට පත් පුද්ගලයින් සඳහා ක්‍රියාකාරිත්වය යථා තත්ත්වයට පත් කිරීමට සහ ජීවන තත්ත්වය වැඩිදියුණු කිරීමට හැකි අනාගත ප්‍රතිකාර සඳහා බලාපොරොත්තුවක් ලබා දෙයි. (මූලාශ්‍ර – මෙතනින්, මෙතනින්, මෙතනින්)

උපතින් ම ගොළු සහ බිහිරි ළමුන්ට කර්ණශේරුකා බද්ධ කිරීමේ සැත්කමක් හරහා සුවය ලබාගත හැකි ද? 

සම්පුර්ණ සුවයක් ලැබීම කෙසේ වෙතත් එක්තරා ප්‍රමාණයකට හෝ හඩ ශ්‍රවනය කිරීමට කර්ණ ශංඛ බද්දයක් හරහා අවස්ථාව ලබාගත හැක. උපතේ සිට ශබ්ද ශ්‍රවණය කිරීමට නොහැකි බිහිරි  අයෙක්ට වුවත් කර්ණ ශංඛ බද්ධය හරහා ශබ්ද ශ්‍රවණය කිරීමට හැකියාවක් ලැබේ .එය මුලින් යම් අපහසුතාවයක් ඇති කරත් කාලයක් සමග වඩාත් සුවපහසු අත්දැකීමක් ලැබේ .ඒ සම්බන්ධ වැඩි විස්තර කියවිය හැකියි මෙතනින් 

බොම්බේ රොටරි සමාජය හරහා උපතින් ම ගොළු සහ බිහිරි ළමුන්ට කර්ණශේරුකා බද්ධ කිරීමේ සැත්කම් සඳහා සහය වනවා ද?

බොම්බේ රොටරි සමාජය යනු ප්‍රජා සත්කාරක සමාජයක් වන අතර  අප මුලින් ම බොම්බේ රොටරි සමාජයේ නිල වෙබ් අඩවිය සහ ෆේස්බුක් ගිණුම පරීක්ෂා කර බැලුවේ, බොම්බේ රොටරි සමාජය හරහා උපතින් ම ගොළු සහ බිහිරි ළමුන්ට කර්ණශේරුකා බද්ධ කිරීමේ සැත්කම් සඳහා සහය දක්වන බවට දැනුවත් කිරීමක් සිදුකර තිබේද යන්න පිළිබඳවයි. නමුත් එවැනි නිල තොරතුරක් ඒවායෙහි සඳහන්ව තිබුණේ නෑ.

එබැවින් බොම්බේ රොටරි සමාජය සහය දක්වන සැත්කම් සම්බන්ධ තොරතුරු පිළිබඳව අප සොයා බැලීමක් සිදුකරනු ලැබුවා. 

එහිදී එම සමාජය ඔස්සේ බොහෝදුරට සහය දක්වා ඇත්තේ ළමා හෘද සැත්කම් සඳහා වන බව එම තොරතුරු ඔස්සේ පැහැදිලි වනවා. එම තොරතුරු මෙතනින්, මෙතනින් සහ මෙතනින්.

එමෙන් ම බොම්බේ රොටරි සමාජයේ සහය ඇතිව SRCC ළමා රෝහලේ කර්ණශේරුකා බද්ධ කිරීමේ සැත්කම් නොමිලේ සිදුකරන බව ද සඳහන්ව තිබූ බැවින් අප ඒ පිළිබඳව ද සොයා බැලීමක් සිදුකරනු ලැබුවා. ඒ අනුව බොම්බේ රොටරි සමාජය, කොකිලබෙන් ධිරුබායි අම්බානි රෝහල, SRCC ළමා රෝහල සහ වාපි හි හාරියා රොටරි රෝහල ඇතුළු එහි හවුල්කාර රෝහල් තුන පුරා හෘද සැත්කම් 237 ක් සඳහා අනුග්‍රහය දක්වා තිබෙන බව රොටරි සමාජයේ නිල වෙබ් අඩවියේ සඳහන්ව තිබුණේ මේ අයුරින්.

නමුත් SRCC ළමා රෝහලේ කර්ණශේරුකා බද්ධ කිරීමේ සැත්කම් නොමිලේ සිදුකිරීමට ඔවුන් අනුග්‍රහාය දැක්වීමක් සම්බන්ධයෙන් තොරතුරු වාර්තා කිරීමක් SRCC ළමා රෝහලේ නිල වෙබ් අඩවියේ හෝ සිදුව නොතිබුණි. 

ඒ අනුව මෙම උපතින් ම ගොළු සහ බිහිරි ළමුන්ට කර්ණශේරුකා බද්ධ කිරීමේ සැත්කම් නොමිලේ සිදුකිරීම සඳහා බොම්බේ රොටරි සමාජය සහය දක්වන බවට පළවන තොරතුරු අසත්‍ය බව පැහැදිලිවනවා.

අපගේ කරුණු විමර්ෂණ පිළිබඳ තොරතුරු දැන ගැනීමට එක්වන්න.

Facebook | Twitter | Instagram | Google News | TikTok