ලක්ෂයට වැඩි වැටුපක් ලබාගන්නා අයට නව බද්දක්? බැංකු තැන්පතුවල පොළිය මත බද්දක්?

False Social

Update 01/06/2022 :

වහාම ක්‍රියාත්මක වන පරිදි වැට් බද්ද හා විදුලි සංදේශ බද්ද ඉහළ දැමීමට යෝජනා වී තිබේ.

මේ අතර ලබන ඔක්තොම්බර් 01වැනිදා සිට ක්‍රියාත්මක වන පරිදි ආදායම් බදු, ඔට්ටු සහ සූදු බදු සංශෝධනය කිරීමට ද නියමිතයි.

රජය ඊයේ (31) නිවේදනය කළ බදු සංශෝධනයන්ට අනුව මෙතෙක් පුද්ගල ආදායම් බදු අය කිරීමේදී නිදහස් කොට තිබූ වාර්ෂික ආදායම් සීමාව මිලියන 3 සිට රුපියල් මිලියන 1.8 ක් දක්වා අඩු කෙරෙනු ඇති.

මෙතෙක් බද්දට යටත් වූයේ, රුපියල් දෙලක්ෂ පනස් සහසකට වැඩි මාසික ආදායමක් ලැබු අය වන අතර නව සංශෝධනය යටතේ මසකට රුපියල් එක්ලක්ෂ පනස් දාහකට වැඩි ආදායමක් ලබන සියලු දෙනා ආදයම් බද්දට යටත්වනු ඇති. එම බදු සංශෝධන සම්බන්ධයෙන් අග්‍රාමාත්‍ය කාර්යාලය විසින් යොමු කළ බදු ප්‍රතිසංස්කරණ යෝජනා මෙතනින්.

මේ සම්බන්ධයෙන් අග්‍රාමාත්‍ය මාධ්‍ය ඒකකය විසින් නිකුත් කළ නිවේදනය මෙම ලිපියේ පහතින්.

විවිධාකාරයේ බදු පැනවීම් සම්බන්ධයෙන් මේ දිනවල සමාජයේ දැඩි කතාබහකට ලක්වන අයුරු අපට සමාජ මාධ්‍ය ඔස්සේ ඒ සම්බන්ධයෙන් පළ වන ඇතැම් සටහන් හරහා දැක ගන්නට ලැබෙනවා. මේ අතර පළවූ සටහන් පෙළක දැක්වුණේ, මාසික ආදයම ලක්ෂයට වැඩි පිරිසගේ බදු අය කර ගන්නා අයුරු දැක්වෙන සටහනක්. ප්‍රධාන පුවත් නාලිකාවක පළ වූ සටහනක් ආකාරයෙන් දැක්වුණු මේ සටහනේ දැක්වෙන කරුණු සත්‍යද යන්න පිළිබඳ අප කළ විමර්ශනයයි මේ.

සමාජ මාධ්‍ය සටහන් :

ෆේස්බුක් ඔස්සේ සංසරණය වූ සටහන් වල දැක්වුණේ, “උපයන විට ගෙවීම මත බදු” මාසිකව ලක්ෂයකට වැඩි වැටුපක් ලබාගන්නා අයවලුන් සඳහා පැනවෙන ආකාරයයි.

ඒ අනුව 100,000-150,000 අතර මාසික වේතනයක් හිමි අයට 4%ක් වන රු.4000 ක බද්දක් ද, රු.150,000 – 200,000 මාසික වැටුප් වේතනයට 8% බද්දක් එනම්, රු. 10,000ක බදු අගයක් ද, රු. 200,000-250,000 මාසික වැටුපට 12%ක බද්දක් එනම් 18,000ක්ද, රු.250,000-3000,000කට මාසික වේතනයකට, 16% එනම් රු 28,000 ක් ද, මාසික වේතනය රු. 300,000-350,000 අතර නම් 20%ක බද්දක් එනම්, රු 40,000ක් ද, මාසික වැටුප රු.350,000 ට වැඩි නම්  24%ක බද්දක් එනම් රු. 54,000ක්ද යනාදී වශයෙන් අය කරනු ලැබේ යනුවෙන් එහි දක්වා තිබුණේ මෙලෙසින්.

Facebook | Archived Link

මෙම සටහන සංසරණය වී තිබූ තවත් අවස්ථාවක් මෙතනින් සහ මෙතනින්.

Archived Link

Update: (20/05/2022)

ඉහත දක්වා ඇති උපයන විට බදු පිලිබඳ සටහනට තවත් කරුණක් එකතු කරමින් “බැංකුවල තැන්පත් කර ඇති මුදල්වලට ලැබෙන පොලිය මත 5%ක නව බද්දක් යනුවෙන්” නව බද්දක් මෑතක දී හඳුන්වා දී ඇති බව ද හඟවමින් සමාජ මාධ්‍ය ඔස්සේ පුවතක් සංසරණය වුණේ මේ අයුරින්.

Facebook | Archived Link

සමාජ මාධ්‍ය ඔස්සේ මෙම සටහන් බහුලව සංසරණය වී තිබුණේ මෙලෙසින්.

මෙම සටහනින් දෙරණ ප්‍රවෘත්ති ප්‍රකාශයක පළ වූ ආකාරයක් දක්වා තිබුණ බැවින් මෑතකදී මෙලෙස පළ වූ පුවතක් බවත් මේ හේතුවෙන් මෑතකදී උපයන විට ගෙවීම් මත බදු අලුත් කර ඇති බවටද අදහසක් හඟවා තිබුණු බැවින්ද මෙහි සත්‍ය කරුණු සොයා අප විමර්ශනයක් සිදු කළේ, මෙලෙසින්.

Fact Check (සත්‍ය තොරතුරු විමර්ශනය කිරීම) :

මෙලෙස මෑතකදී බදු සංශෝධනක් සිදුවූ ඇත්දැයි අප නිරීක්ෂණය කළ අතර එවන් සංශෝධනයක් සිදු වූ බවට පුවත් වාර්තා දැක ගැනීමට හැකි වුනේ නැහැ.

උපයන විට ගෙවීමේ බදු හෙවත් PAYE බදු රු.250,000කට අඩු වේතනයක් ලබන රජයේ හෝ පෞද්ගලික අංශයේ සේවකයන්ගෙන් අයකිරීමක් සිදු නොවෙන බවට පසුගිය අවුරුද්දේ එනම් 2020 වර්ෂයේ ජනවාරි 01 වන දින සිට ක්‍රියාත්මක වන පරිදි 2017 අංක 24 දරන දේශීය ආදායම් පනත සංශෝධනය කිරීම සඳහා දේශීය ආදායම් (සංශෝධන) පනත් කෙටුම්පත මගින් සිදු කෙරිණ. ඒ බවට පළ වූ පුවත් මෙතනින්, මෙතනින් සහ මෙතනින්.

අප මේ සම්බන්ධයෙන් වැඩිදුර තොරතුරු තහවුරු කර ගැනීම සඳහා දේශීය ආදායම් දෙපාර්තමේන්තුවේ වෙබ් අඩවියේ ඇති 2020/2021 වර්ෂය සඳහා ආදායම් වාර්තාව, උපලේඛන සහ වත්කම් හා බැරකම් ප්‍රකාශය පිරවීම සඳහා උපදෙස් මාලාවද නිරීක්ෂණය කරනු ලැබුවා. 

එහිදීද සඳහන් වූයේ, උපයන විට ගෙවීමේ ආදායම් බදු අය කිරීමේ අවම සීමාව රු.250,000ක් දක්වා සංශෝධනය කර ඇති බවයි. ඒ අනුව වාර්ෂිකව මිලියන 3ක් දක්වා (රු.250,000 x 12) PAYE බදු අයකිරීමක් මේ වන විට සිදුවන්නේ නැහැ. වාර්ෂික ආදායම මිලියන 3ට වැඩි නම් වැඩිවන පළමු මිලියන 3ට 6%ක බද්දක්ද, ඊළඟ මිලියන 3ට 12%ක් සහ ඉන්පසුව 18%ක් වශයෙන් බදු පැනවීමක් සිදුවෙනවා. (30 වන පිටුව)

IRD | Archived Link

තව දුරටත් මෙම ප්‍රතිශත තහවුර කර ගැනීම සඳහා අප ලේක් හවුස් ආයතනයේ අරමුදල් කළමනාකරණ අංශ ප්‍රධානී ඩී.එම්. ධනසේන මහතා සම්බන්ධ කරගත්තා. ඒ මහතා පවසා සිටියේ, PAYE බදු රු.250,000කට අඩු මාසික වේතනයක් ලබන සේවකයන්ගෙන් අයකිරීමක් සිදු නොකෙරෙන බවයි. පසුගිය වර්ෂයේ බදු සංශෝධනයට අනුව රු.250,000 ට වැඩි ආදායමක් ලබන සේවා නියුක්තිකයෙකු නම් දේශීය ආදායම් දෙපාර්තමේන්තුවේ බදු ලිපිගොනුවක් විවෘත කර ස්වයං තක්සේරුව මගින් බදු ගෙවීම සිදුකළ හැකි බවත් අවධාරණය කළා. 

ඒ අනුව වාර්ෂික ආදායම මිලියන 03 ට වැඩි පුද්ගලයින්ට, පුද්ගලිකව ආදායම් බදු ලිපිගොනු විවෘත කර ගත හැකි අතර එසේ නොවන්නේනම් පෙර උපයන විට බදු ගෙවූ පරිදි වැටුපෙන් අඩුකර සේවා යෝජකයා හරහා අදාළ බදු මුදල් ගෙවීමට හැකියි. ඒ බවට පළ වූ පුවත් වාර්තාවක් මෙතනින්.

ඒ අනුව මෙතෙක් මාසිකව රු.250,000 ට අඩු ආදායමක් ලබන සේවා නියුක්තිකයන් උපයන විට ගෙවීමේ ආදායම් බදු අය කිරීමට අයත් නොවන බවට පැහැදිලි වෙයි.

සමාජ මාධ්‍ය ඔස්සේ සංසරණය වූ ඉහත සඳහන් සටහන සම්බන්ධයෙන් අප කළ නිරීක්ෂණයේදී තහවුරු වූයේ  එය, 2018 වර්ෂයේ සිදු වූ බදු සංශෝධනය සම්බන්ධයෙන් ‘දෙරණ’ රූපවාහිනි නාලිකාවේ ප්‍රවෘත්ති විකාශයේ පළ වූ ප්‍රවෘත්තික බදු අය කිරීම් සම්බන්ධනේ දැක්වීමට භාවිතා කළ තොරතුරු සටහනක් බවයි. එම වීඩියෝව මෙතනින්.(0.20)

එමෙන්ම ආදායම මත උපයන බදු සම්බන්ධයෙන් නැවතත් කතා බහට ලක්වූයේ පසුගිය සැප්තැම්බර් 12 වන දා ‘දෙරණ’ නාලිකාවේ BIG FOCUS TODAY වැඩ සටහන සඳහා දැඩි ‘බදු ප්‍රතිපත්ති හා පීඩිත ජනතාව’ යන මෙයින් සාකච්ඡා කිරීමට වෙළඳ අමාත්‍ය බන්දුල ගුණවර්ධන මහතා පැමිණි අවස්ථාවේ ඒ මහතා සඳහන් කළේ, තමන් මුදල් ඇමතිට යෝජනා කළේ, ‘සමාජ සංරක්ෂණ දායක මුදල’ නමින් රු.ලක්ෂයකට වඩා මාසික දළ ආදායමක් ලබන සියලු පිරිසගෙන් 5%ක වත් බද්දක් අය කළ හැකි බවට සඳහන් කිරීමත් සමග මෙවැනි සටහන් නිර්මාණය වූ බවට උපකල්පනය කළ හැකියි. එම වැඩ සටහන මෙතනින්.(44.37)

කෙසේවෙතත් පසුගියදා මේ සම්බන්ධයෙන් කැබිනට් තීරණ දැනුම් දීමේ මාධ්‍ය හමුවේදී, ජනමාධ්‍ය අමාත්‍ය ඩලස් අලහප්පෙරුම මහතාගෙන් මාධ්‍යවේදීයෙකු විමසූ පැනයට පිළිතුරු ලබා දෙමින් ඒ මහතා සඳහන් කළේ, එවැනි තීරණයක් රජය විසින් ගෙන නොමැති බවත් එය බන්දුල අමාත්‍යවරයාගේ පුද්ගලික යෝජනවාක් පමණක් බවයි. එම අවස්ථාව මෙතනින්.

මේ සම්බන්ධයෙන් ඉදිරි දිනකදී හෝ අයවැය යෝජනා හරහා යම්කිසි සංශෝධනයක් සිදුවහොත් එය මෙහි යාවත්කාලීන කිරීමට අප බලපොරෝත්ත්තු වෙමු.

Update: (20/05/2022)

2020 ජනවාරි මස සිදු වූ බදු සංශෝධනයට අනුව මෙරට බැංකුවක රඳවා ඇති මුදලකට ලැබෙන පොලිය මත 5% බද්දක් අය කිරීම අහෝසි කර තිබු බව මෙරට රාජ්‍ය මෙන්ම පෞද්ගලික බැංකු කිහිපයකින් ම අප කළ විමසීමේදී තහවුරු කරනු ලැබුවා.

කෙසේනමුත් එක් රාජ්‍ය බැංකුවක් (BOC) සඳහන් කළේ, ස්ථාවර තැන්පතු වලින් ලැබෙන මාසික පොලිය රු. 250,000 ඉක්මවූ අයට පමණක් 5%ක බද්දක් අය කරන බවයි.

එසේම මේ දිනවල හුවමාරු වන සටහනම 2018 අප්‍රේල් 1 වැනිදා හුවමාරු කර ගෙන තිබු අවස්ථාවක් මෙතනින්. මේ අනුව සටහන් පැරණි පුවතක් අනුසාරයෙන් නැවත වරක් හුවමාරු වන සටහන් පෙළක් බව පැහැදිලි වෙනවා.

ඒ පිළිබඳ අප තවදුරටත් සිදුකළ විමර්ශනයේ දී දැක ගන්නට ලැබුණේ, 2018 වර්ෂයේ බදු සංශෝධනය සම්බන්ධයෙන් ‘දෙරණ’ රූපවාහිනි නාලිකාවේ ප්‍රවෘත්ති විකාශයේ පළ වූ ප්‍රවෘත්තික බදු අය කිරීම් සම්බන්ධනේ දැක්වීමට භාවිතා කළ තොරතුරු සටහනක් බවයි.

එම වීඩියෝව මෙතනින්. (2018 මාර්තු 31)

PAYE බදු සම්බන්ධයෙන් ද අප නැවත වරක් 2022 මැයි මස හුවමාරු වන සටහන් සම්බන්ධනේ දේශීය ආදායම් දෙපර්තම්නේතුවෙන් විමසා සිටියේ කිසියම් හෝ වෙනසක් සිදුව ඇත්ද පිළිබඳවයි. එහිදී ඔවුන් තහවුරු කර සිටියේ ද ඉහත 2021 සැප්තැම්බර් මස අප සිදුකල විමර්ශනෙය් පරිදි ම මේ දක්වා ද උපයන විට ගෙවීමේ ආදායම් බදු (PAYE Tax)අය කිරීමේ අවම සීමාව රු.250,000 ලෙස නොවෙනස් ව පවතින බවයි.

මේ සම්බන්ධයෙන් ඉදිරි දිනකදී හෝ අයවැය යෝජනා හරහා යම්කිසි සංශෝධනයක් සිදුවහොත් එය මෙහි යාවත්කාලීන කිරීමට අප බලපොරෝත්ත්තු වෙමු.

Update 01/06/2022 :

මේ සම්බන්ධයෙන් අග්‍රාමාත්‍ය මාධ්‍ය ඒකකය විසින් නිකුත් කළ නිවේදනය පහතින්.

මාධ්‍ය නිවේදනය

2019 වසරේ අග භාගයේ දී ශ්‍රී ලංකාව ලිහිල් බදු ක්‍රමවේදයක් හඳුන්වා දෙන ලදී. කෘෂිකර්මය සහ තොරතුරු තාක්ෂණය හා සඵල සේවා සඳහා බදු නිදහස් කිරීම්, බදු අඩු කිරීම් සහ බදු විරාම වැනි බදු සහන ගණනාවක් හඳුන්වා දෙමින්, එකතු කළ අගය මත බද්ද, පුද්ගල ආදායම් බද්ද, සංස්ථාපිත ආදායම් බද්ද යන බදුවල අනුපාත අඩු කිරීම සහ එකතු කළ අගය මත බද්දෙහි හා පුද්ගල ආදායම් බද්දෙහි බදු පදනම සංකෝචනය කිරීම මෙම ප්‍රතිසංස්කරණවලට ඇතුළත් විය. මේ හේතුවෙන් වාර්ෂිකව රුපියල් බිලියන 600 ත් 800 ත් අතර ප්‍රමාණයක බදු ආදායමක් රටට අහිමි විය.

කෙසේ වුවද, 2020/2021 වසරවල දී ආදායම් එකතු කිරීමේ ක්‍රියාවලියට බලපෑම් එල්ල කරන ලද කොවිඩ්-19 වසංගතයේ ව්‍යාප්තිය සහ ඒ ආශ්‍රිත ප්‍රවණතා යම් තාක් දුරකට හේතු වුවද, මෙම බදු ප්‍රතිසංස්කරණ, රාජ්‍ය ආදායම සැළකිය යුතු ලෙස අඩු වීමට හේතු වූ ප්‍රතිපත්ති ලෙස මේ වන විට සැළකෙන අතර, එහි ප්‍රතිඵලයක් වශයෙන් දළ දේශීය නිෂ්පාදිතයෙහි (ද.දේ.නි) ප්‍රතිශතයක් ලෙස කලාපයේ අඩුම ආදායම් අනුපාතය මෙරටින් වාර්තා විය. 2019 වසරේ සියයට 12.7 ක් ව පැවති එම අනුපාතය, 2020 වසරේ දී සියයට 9.1 දක්වා අඩු වූ අතර, 2021 වසරේ දී එය සියයට 8.7 දක්වා තවදුරටත් අඩු විය. මෙය නැගී එන වෙ‍ෙළඳපොළ සහ සංවර්ධනය වෙමින් පවතින ආර්ථිකයන් හි සමාන්‍යය වන සියයට 25 ට වඩා සැළකිය යුතු ලෙස අඩු අගයක් ගනී.

මෙම ලිහිල් බදු ක්‍රමවේදය, ආදායම් රැස් කිරීම සඳහා කොවිඩ්-19 වසංගතයෙන් ඇති වූ බලපෑම සමඟින් වසංගත සහන ක්‍රියාමාර්ග හේතුවෙන් 2019 වසරේ දී ද.දේ.නි යෙන් සියයට 9.6 ක් ව පැවති අයවැය හිඟය, 2020 වසරේ දී සියයට 11.1 දක්වා ද, 2021 වසරේ දී සියයට 12.2 දක්වා ද සැළකිය යුතු ලෙස පුළුල් විය. එබැවින් 2019 වසරේ දී සියයට 86.9 ක් ව පැවති ද.දේ.නි. යෙහි ප්‍රතිශතයක් ලෙස රාජ්‍ය ණය 2020 වසරේ දී සියයට 100.6 දක්වා ද, 2021 වසරේ දී සියයට 104.6 දක්වා ද වැඩි විය.

මෙම රාජ්‍ය මූල්‍ය අසමතුලිතතාවය ආර්ථිකය කෙරෙහි අහිතකර ලෙස බලපානු ලබයි. පෙර නොවූ විරූ උද්ධමනකාරී පීඩනය, දීර්ඝ කාලයක් තිස්සේ අඛණ්ඩව පවතින විශාල රාජ්‍ය මූල්‍ය සහ ගෙවුම් ශේෂ මූල්‍යයන අවශ්‍යතා, අධික ණය බර සහ තීරණාත්මක ලෙස පහළ මට්ටමක පවතින සංචිත ප්‍රමාණය සහ විනිමය අනුපාතය කෙරෙහි එල්ල වන පීඩනයන් සමඟ ශ්‍රී ලංකා ආර්ථිකයේ ඉදිරි දැක්ම අවදානම් සහගත මට්ටමක පවතී. විදේශ විනිමය හිඟය සහ එහි ප්‍රතිඵලයක් ලෙස දැනට රටේ පවතින ආර්ථික තත්ත්වය මෙන්ම ණය ශ්‍රේණිගත කිරීම් පහළ දැමීම හේතුවෙන් ව්‍යාපාරික සහ ආයෝජක විශ්වාසය නැති වීම ආර්ථීක වර්ධනයට අහිතකර ලෙස බලපානු ඇත.

ජාත්‍යන්තර වෙ‍ෙළඳපොළ ප්‍රවේශය අහිමි වීම සහ වෙනත් විදේශ විනිමය ගලා ඒම් සාපේක්ෂව අඩු වීම හේතුවෙන් රාජ්‍ය අයවැය හිඟය මූල්‍යයනය සම්බන්ධයෙන් සැළකිය යුතු ගැටළු රාශියක් නිර්මාණය වී තිබේ. 2020 සහ 2021 වසරවල දී, විදේශ මූලාශ්‍ර සඳහා ශුද්ධ ණය ආපසු ගෙවීමක් වාර්තා වන බැවින් සමස්ත අයවැය හිඟයම දේශීය මූලාශ්‍රවලින් මූල්‍යයනය කෙරිණ. බැංකු නොවන දේශීය මූලාශ්‍ර හරහා ප්‍රමාණවත් ශුද්ධ මූල්‍යයනයක් ලබා ගැනීමට නොහැකි වීම හේතුවෙන්, අයවැය හිඟය මූල්‍යයනය කරන ලද දේශීය මූලාශ්‍ර අතුරින් බහුතරයක් බැංකු මූලාශ්‍රවලින්, විශේෂයෙන්ම ශ්‍රී ලංකා මහ බැංකුවෙන් ලබා ගන්නා ලදී. අඛණ්ඩව ලබා ගන්නා ලද සැළකිය යුතු මහ බැංකු මුදල් මූල්‍යයනය ආර්ථිකයට විශේෂයෙන්ම උද්ධමනයට සහ විනිමය අනුපාතයට අහිතකර ලෙස බලපෑම් එල්ල කරන ලදී.

පොළී ගෙවීම්, වැටුප් හා වේතන, විශ්‍රාම වැටුප් සහ සමෘද්ධි දීමනා යනාදී වියදම්වල සැළකිය යුතු කොටසක් ඇතුළුව රාජ්‍ය වියදම් දැරිමට මහා භාණ්ඩාගාරයට වැඩි වශයෙන් මහ බැංකු මුදල් මූල්‍යයනය ලබා ගැනීමට සිදුවන අතිශය තීරණාත්මක මට්ටමට වර්තමානයේ දී පත්ව ඇත. මෙය කිසිසේත්ම තිරසාර තත්ත්වයක් නොවේ. එබැවින් සාර්ව ආර්ථික ස්ථායිතාවය තහවුරු කිරීම පිණිස මෙරට මධ්‍ය කාලීන මෙන්ම දීර්ඝ කාලීන ආර්ථික වර්ධන අභිමතාර්ථ සඳහා සහාය දැක්වීමට 2022 වසරේ දී සහ ඉන් ඔබ්බට ආදායම් වැඩි කර ගැනීමේ  මෙන්ම වියදම් තාර්කීකරණය කිරීමේ ක්‍රියාමාර්ග මඟින් ශක්තිමත් රාජ්‍ය මූල්‍ය ඒකාග්‍රතාවයක් ඇති කර ගැනීම අත්‍යාවශ්‍ය වේ.

ඉහත පසුබිම යටතේ, පහත සඳහන් බදු ප්‍රතිසංස්කරණ කඩිනමින් මෙන්ම හැකි ඉක්මනින් ක්‍රියාත්මක කිරීමට යෝජනා කෙරේ.

බදු ප්‍රතිසංස්කරණ යෝජනා පහතින් අමුණා ඇත.

අග්‍රාමාත්‍ය මාධ්‍ය ඒකකය

2022.05.31

Also Read : Fact Check: අර්ථසාධකය ලක්ෂ 7 ට වැඩි නම් 14% ක බද්දක්?

අපගේ කරුණු විමර්ශන පිළිබඳ තොරතුරු දැන ගැනීමට එක්වන්න

Facebook | Twitter | Instagram | Google News 

Conclusion (අවසාන නිගමනය):

අපගේ කරුණු අනාවරණය අනුව පෙන්වා දිය හැක්කේ, ෆේස්බුක් ඔස්සේ සංසරණය වූ සටහන් වල දැක්වූ “උපයන විට ගෙවීම මත බදු” (PAYE Tax) මාසිකව  රුපියල් ලක්ෂයකට වැඩි වේතනයක් ලබන අයවලුන්ගේ සිට ඉහළට අය කරනු ලබන බවට සඳහන් සටහන් අසත්‍ය බවයි. එම සටහන 2018 වර්ෂයේ සිදු වූ බදු සංශෝධනයට අයත් ප්‍රතිශත වන අතර එම වර්ෂයේ පළ වූ ප්‍රවෘත්තියකට අදාළ සටහනක් මේ දිනවල හුවමාරු කර ගනිමින් දැක්වීමට උත්සහ කර තිබුණේ, වර්තමානයේ මේ ආකාරයේ නව බදු සංශෝධන ක්‍රියාත්මක වී ඇති බවක්. කෙසේනමුත් අවසන් වරට 2020 ජනවාරි මස සිදුවූ බදු සංශෝධන අනුව “උපයන විට ගෙවීමේ ආදායම් බදු” (PAYE) අය කෙරෙන්නේ මාසික වේතනය රු.250,000කට (වසරකට මිලියන 3කට) වැඩි වැටුපක් ලබාගන්නා අවස්ථාවක දී පමණක් වන අතර ඊට අමතරව වෙනත් නව බදු පැනවීමක් මෙතක් සිදුවී නැහැ.

මේ ආකාරයටම 2020 ජනවාරි මස සිදු වූ බදු සංශෝධනයට අනුව මෙරට බැංකුවක රඳවා ඇති මුදලකට ලැබෙන පොලිය මත 5% බද්දක් අය කිරීම අහෝසි කර තිබු බව මෙරට රාජ්‍ය මෙන්ම පෞද්ගලික බැංකු කිහිපයකින් ම අප කළ විමසීමේදී තහවුරු කරනු ලැබුවා.

Avatar

Title:ලක්ෂයට වැඩි වැටුපක් ලබාගන්නා අයට නව බද්දක්?

Fact Check By: Pavithra Sandamali 

Result: False


Leave a Reply