දිනපතා සත්ය කරුණු දැන ගැනීමට අපගේ WhatsApp චැනලයටමෙතනින් එකතුවන්න.
බංකොලොත් රටක සිට වසර දෙකකින් ලෝකයෙන්ම 4 වන තැනට ශ්රී ලංකාව පත්ව ඇති බව දක්වමින් සටහනක් සමාජ මාධ්ය ඔස්සේ හුවමාරු වී තිබුණි. එම සටහනෙහි දක්වා තිබූ ප්රස්තාරයෙහි ඇමරිකාව, චීනය, කැනඩාව සහ ශ්රී ලංකාව පිලිවෙලින් මුල් ස්ථාන හතරෙහි දක්වා ඇත. අදාළ සටහන මගින් ප්රකාශිත අදහස ශ්රී ලංකාව පසුගිය වසර දෙක තුළ ඇමරිකාව, චීනය සහ කැනඩාව යන රටවල් ත්රිත්වයට පසු ලෝකයෙන්ම සිව්වන ස්ථානයට පත්ව ඇති බවයි. මෙහි සත්ය අසත්යභාවය සොයා බලමින් අප විසින් සිදු කළ කරුණු පරීක්ෂාව පහතින්.
සමාජ මාධ්ය සටහන් (Social Media Posts) :
මේ සම්බන්ධ තවත් සටහන් පහතින්.
Facebook Facebook Facebook Instagram
මෙහි සත්ය අසත්යභාවය සොයා බැලීමට අප කටයුතු කළා
Fact Check (සත්ය තොරතුරු විමර්ශනය කිරීම) :
ඇමරිකාව, චීනය, කැනඩාව යන රටවල් සමඟ කුමන හෝ දර්ශකයකින් ශ්රී ලංකාව පිලිවෙලින් සිව්වැනි ස්ථානයට පත් වූ බවට ඉහත සමාජ මාධ්ය සටහනේ දැක්වෙන දර්ශකය කිසිඳු නිල ජාත්යන්තර වාර්තාවක් හෝ ආයතනයක් මගින් පළ කර නොමැති බව අප විසින් සිදු කළ මූලික පරීක්ෂාවේදී පැහැදිලි විය.
ජාත්යන්තර මූල්ය ආයතන (Institute of International Finance – IIF) නිල වාර්තාව
කෙසේ නමුත් ශ්රී ලංකාව 2026 වසරේදී ආයෝජක සබඳතා සහ ණය විනිවිදභාවය වේගයෙන්ම වර්ධනය කරගත් රටවල් අතරින් සිව්වැනි ස්ථානයට පත්ව ඇති බව ජාත්යන්තර මූල්ය ආයතනය (Institute of International Finance – IIF) මෑතකදී සිය නිල වාර්තාව මගින් තහවුරු කර ඇත. නමුත් මෙම දර්ශකයේද ශ්රී ලංකාවට ඉදිරියෙන් වැඩිම වර්ධනයක් පෙන්වා ඇත්තේ වියට්නාමය, බෙලීස් සහ මොසැම්බික් යන රටවල් ය. ඇමරිකාව, චීනය සහ කැනඩාව යන රටවල් නොවේ.
2026 වසර සඳහා මතුවෙමින් පවතින වෙළඳපලවල් සහ සංවර්ධනය වෙමින් පවතින ආර්ථිකයන් 57 ක ආයෝජක සබඳතා සහ ණය විනිවිදභාවය පිළිබඳ මෙහිදී ඇගයීම් සිදු කර ඇත. එම සම්පූර්ණ වාර්තාව මෙතනින්.
IIF ආයතනය මගින් නිකුත් කරන ලද “Investor Relations and Debt Transparency Report 2026: The Transparency Dividend” නැමැති නිල වාර්තාවට අනුව ශ්රී ලංකාව ලබාගෙන ඇති ප්රගතිය සහ ප්රධාන දර්ශක පහත පරිදි වේ.
1. ආයෝජක සබඳතා දර්ශකය (Investor Relations Country Score)
ලොව නැගී එන වෙළෙඳපොළවල් සහ සංවර්ධනය වෙමින් පවතින ආර්ථිකයන් 57ක් ඇගයීමට ලක් කළ මෙම ආයෝජක සබඳතා සහ ණය විනිවිදභාවය දර්ශකයේ, පසුගිය වසරට සාපේක්ෂව වේගයෙන්ම වර්ධනය වූ රටවල් අතර 4 වැනි ස්ථානය ශ්රී ලංකාව දිනාගෙන ඇත. සමස්ත ලකුණු 50න් ලකුණු 43.67ක් ලබා ගැනීමට ශ්රී ලංකාව සමත්ව ඇති අතර, එය 2025 වසරේ පැවති ලකුණු 37.33ක මට්ටමට සාපේක්ෂව ලකුණු 6.3ක කැපී පෙනෙන වර්ධනයකි.
| ස්ථානය | රට | ලකුණු වර්ධනය |
| 1 | වියට්නාමය (Vietnam) | +10.9 |
| 2 | බෙලීස් (Belize) | +8.2 |
| 3 | මොසැම්බික් (Mozambique) | +6.4 |
| 4 | ශ්රී ලංකාව (Sri Lanka) | +6.3 |
| 5 | එල් සැල්වදෝරය (El Salvador) | +2.7 |
| 6 | බහරේනය (Bahrain) | +2.5 |
| 7 | බොලිවියාව (Bolivia) | +2.4 |
| 8 | කැමරූන් (Cameroon) | +2.4 |
| 9 | එතියෝපියාව (Ethiopia) | +2.3 |
| 10 | ඉක්වදෝරය (Ecuador) | +1.6 |
ශ්රී ලංකාව සිව්වන ස්ථානය ලබාගෙන ඇත්තේ “ආයෝජක සබඳතා ලකුණු වල සිදු වූ වර්ධනය” (Change in IR Country Scores, 2026-2025) යන දර්ශකය යටතේය. එබැවින් ශ්රී ලංකාව ලබා ඇති මෙම සිව්වන ස්ථානය ආයෝජක සබඳතා සහ ණය විනිවිදභාවය වේගයෙන්ම වර්ධනය කරගත් රටවල් අතර සිව්වැනි ස්ථානයට පත්වීම ලෙස හැඳින්වීම නිවැරදි වේ.
2. රාජ්ය ණය විනිවිදභාවය (Debt Transparency Score)
ණය විනිවිදභාවය සම්බන්ධ දත්ත නිවැරදිව හෙළිදරව් කිරීමේ දර්ශකය තුළද ශ්රී ලංකාව විශාල ප්රගතියක් පෙන්වමින් ලෝකයේ 5 වැනි ස්ථානය දක්වා ඉහළට පැමිණ ඇත. ණය විනිවිදභාවය සඳහා වෙන් වූ උප දර්ශකයේ උපරිම ලකුණු 13න් ලකුණු 11.25ක් ලබා ගැනීමට ශ්රී ලංකාව සමත් වී ඇත.
| ස්ථානය | රට | ලකුණු වර්ධනය |
| 1 | බහරේනය (Bahrain) | +2.8 |
| 2 | අසර්බයිජානය (Azerbaijan) | +1.8 |
| 3 | එල් සැල්වදෝරය (El Salvador) | +1.5 |
| 4 | මොන්ගෝලියාව (Mongolia) | +1.1 |
| 5 | ශ්රී ලංකාව (Sri Lanka) | +1.0 |
| 6 | කැමරූන් (Cameroon) | +0.6 |
| 7 | බෙලීස් (Belize) | +0.6 |
| 8 | බොලිවියාව (Bolivia) | +0.5 |
| 9 | ජැමෙයිකාව (Jamaica) | +0.5 |
| 10 | රුමේනියාව (Romania) | +0.3 |
3. පාරිසරික, සමාජීය සහ පාලන තොරතුරු ව්යාප්තිය (ESG Data and Policy Dissemination Score)
මෙම උප දර්ශකය මගින් පාරිසරික සහ සමාජීය ප්රතිපත්ති පිළිබඳ තොරතුරු ජාත්යන්තර ආයෝජකයින්ට සැපයීමේ හැකියාව මනිනු ලබයි. මෙහිදීද ශ්රී ලංකාව උපරිම ලකුණු 4.0න් ලකුණු 3.25ක් ලබාගෙන ඇති අතර, තායිලන්තය, එල් සැල්වදෝරය සහ නයිජීරියාව වැනි රටවල් සමඟ වසරින් වසර ඉහළම වර්ධනයක් පෙන්වූ රටවල් අතරට ඇතුළත් වී ඇත. පාරිසරික, සමාජීය සහ පාලන (ESG) දත්ත බෙදාහැරීමේ ප්රගතිය අතින් ශ්රී ලංකාව ලොව පස්වන ස්ථානය ලබාගෙන ඇත.
| ස්ථානය | රට | ලකුණු වර්ධනය |
| 1 | තායිලන්තය (Thailand) | +1.1 |
| 2 | ඉතියෝපියාව (Ethiopia) | +0.8 |
| 3 | සැල්වදෝරය (El Salvador) | +0.8 |
| 4 | බෙලීස් (Belize) | +0.8 |
| 5 | ශ්රී ලංකාව (Sri Lanka) | +0.8 |
| 6 | නයිජීරියාව (Nigeria) | +0.6 |
| 7 | රුමේනියාව (Romania) | +0.6 |
| 8 | මොන්ගෝලියාව (Mongolia) | +0.6 |
| 9 | ජැමෙයිකාව (Jamaica) | +0.5 |
| 10 | වියට්නාමය (Vietnam) | +0.5 |
IIF වාර්තාව පෙන්වා දෙන පරිදි, ශ්රී ලංකාව ලබා ඇති මෙම ප්රගතියට ප්රධානතම හේතුව වී ඇත්තේ 2024 දෙසැම්බර් මාසයේදී මුදල් අමාත්යාංශයේ රාජ්ය ණය කළමනාකරණ කාර්යාලය (PDMO) යටතේ නිල ආයෝජක සබඳතා වැඩසටහනක් විධිමත්ව ආරම්භ කිරීමයි. එමගින් ජාත්යන්තර ණයහිමියන් සහ ආයෝජකයින් සමඟ විශ්වසනීය මෙන්ම විනිවිදභාවයකින් යුත් සන්නිවේදනයක් ගොඩනැඟීමට හැකි වී තිබේ. IIF ආයතනය සිය නිල වාර්තාව මගින් අවධාරණය කරන්නේ, මූල්ය සහ ණය දත්ත මෙලෙස විනිවිදභාවයෙන් යුතුව නියමිත වේලාවට ලබා දීම මගින් ආයෝජකයින් තුළ පවතින අවිශ්වාසය අඩු වන අතර එය රටේ ණය ශ්රේණිගත කිරීම් ස්ථාවර කර ගැනීමට මෙන්ම දිගුකාලීනව ණය පිරිවැය අඩු කර ගැනීමට උපකාරී වන බවයි. වැඩිදුර තොරතුරු මෙතනින්, මෙතනින් සහ මෙතනින්.
මෙම IIF ඇගයීම තුළ ශ්රී ලංකාව, චීනය හැරුණු විට ඉහත සමාජ මාධ්ය සටහනේ දැක්වෙන අනෙකුත් රටවල් කිසිවක් අන්තර්ගත වන්නේ නැත.
මෙම IIF ආයෝජක සබඳතා සහ ණය විනිවිදභාවය පිළිබඳ ඇගයීම සිදු කරනු ලබන්නේ ලොව පුරා සිටින නැගී එන වෙළෙඳපොළවල් සහ සංවර්ධනය වෙමින් පවතින ආර්ථිකයන් 57ක් සඳහා පමණි. ඉහත සමාජ මාධ්ය සටහනේ දැක්වෙන ඇමරිකා එක්සත් ජනපදය, කැනඩාව, ජපානය, ෆින්ලන්තය, නෝර්වේ සහ ස්විට්සර්ලන්තය වැනි රටවල් ලෝකයේ දියුණු වෙළෙඳපොළවල් බැවින්, ඒවා මෙම 57 දෙනාගේ ලැයිස්තුවට අදාළ නොවේ.
චීනය මෙම ලැයිස්තුවේ සිටියද වෙනස් මට්ටමක පවතී. චීනය නැගී එන වෙළෙඳපොළක් ලෙස සලකා IIF ආයතනයේ ඇතැම් වාර්තාවලට ඇතුළත් කළද, ඔවුන් ශ්රී ලංකාව මෙන් මෑතකදී ණය අර්බුදයකට මුහුණ දී ජාත්යන්තර මූල්ය අරමුදල (IMF) සමඟ විශේෂ ණය ප්රතිව්යුහගතකරණ වැඩසටහන් ක්රියාත්මක කරන රටක් නොවේ. එබැවින් මෑතකදී “වේගයෙන්ම වර්ධනය වන” කාණ්ඩයේ ඉහළට පැමිණීමට ඔවුන්ට අවශ්යතාවයක් නැත.
ඒ අනුව පැහැදිලි වන්නේ IIF ආයතනය විසින් මෑතකදී ප්රකාශ කළ ආකාරයට ආයෝජක සබඳතා සහ ණය විනිවිදභාවය පිළිබඳ ඇගයීම් දර්ශක තුළ ශ්රී ලංකාව සිව්වන සහ පස්වන ස්ථාන අතරට පත්වූයේ වියට්නාමය, බෙලීස් සහ මොසැම්බික් වැනි සංවර්ධනය වෙමින් පවතින රටවල් සමඟ මිස, ඇමරිකාව, ජපානය හෝ කැනඩාව වැනි රටවල් සමඟ නොවන බවයි.
Remitly 2026 සංක්රමණ දර්ශකය (Immigration Index)
එසේම, ඩිජිටල් මූල්ය සේවා සපයන Remitly ආයතනයේ 2026 ගෝලීය වාර්තාවට අනුව, පවුල් වශයෙන් පදිංචි වීම සඳහා ලොව හොඳම රටවල් අතර ශ්රී ලංකාව 4 වන ස්ථානයට පත්ව ඇති අතර, මුල් ස්ථාන තුන ස්පාඤ්ඤය, චීනය සහ ඇමරිකා එක්සත් ජනපදය දිනාගෙන ඇත. එම වාර්තාව මෙතනින්.
කෙසේ නමුත් එම දර්ශකයද ඉහත සමාජ මාධ්ය සටහනෙහි දක්වා ඇති දර්ශකයට සමාන නොවේ.
මීට අමතරව ලොව පොදුවේ පිළිගත් ප්රධාන ජාත්යන්තර සංවර්ධන දර්ශක ඔස්සේ ඉහත සමාජ මාධ්ය සටහනෙහි දක්වා ඇති රටවල් වල සැබෑ ගෝලීය ශ්රේණිගත කිරීම් මෙසේය.
| රට (Country) | GDP හෙවත් දළ දේශීය නිෂ්පාදිතය අනුව (IMF 2026 GDP) | මානව සංවර්ධන දර්ශකය (UNDP HDI 2026) | ලෝක සතුටුදායකම රටවල් (WHR 2026) |
| ශ්රී ලංකාව (Sri Lanka) | 81 වන ස්ථානය | 89වන ස්ථානය | 134 වන ස්ථානය |
| ඇමරිකාව (USA) | 1 වන ස්ථානය | 17 වන ස්ථානය | 23 වන ස්ථානය |
| චීනය (China) | 2 වන ස්ථානය | 78 වන ස්ථානය | 65වන ස්ථානය |
| ජපානය (Japan) | 4 වන ස්ථානය | 23 වන ස්ථානය | 61 වන ස්ථානය |
| කැනඩාව (Canada) | 11 වන ස්ථානය | 16වන ස්ථානය | 25 වන ස්ථානය |
| නෝර්වේ (Norway) | 31 වන ස්ථානය | 2 වන ස්ථානය (නෝර්වේ සහ ස්විස්ටර්ලන්තය සම ස්ථාන වල පසුවේ) | 6 වන ස්ථානය |
| ස්විස්ටර්ලන්තය (Switzerland) | 20 වන ස්ථානය | 2 වන ස්ථානය (නෝර්වේ සහ ස්විස්ටර්ලන්තය සම ස්ථාන වල පසුවේ) | 10 වන ස්ථානය |
| ෆින්ලන්තය (Finland) | 50 වන ස්ථානය | 12වන ස්ථානය | 1 වන ස්ථානය |
අපගේ කරුණු විමර්ශන පිළිබඳ තොරතුරු දැන ගැනීමට එක්වන්න
Facebook | Twitter | Instagram | Google News | TikTok
Conclusion (අවසාන නිගමනය) :
අපගේ කරුණු විමර්ශනයෙන් පෙන්වා දෙන්නේ, ඇමරිකාව, චීනය, කැනඩාව යන රටවල් සමග පිළිවෙලින් ශ්රී ලංකාව සිව්වැනි ස්ථානය දිනා ගෙන ඇති බව දක්වමින් හුවමාරු වන සමාජ මාධ්ය සටහන නොමග යවන සුළු බවයි. ඇමරිකාව, චීනය, කැනඩාව යන රටවල් සමඟ කුමන හෝ දර්ශකයකින් ශ්රී ලංකාව පිලිවෙලින් සිව්වැනි ස්ථානයට පත් වූ බවට ඉහත සමාජ මාධ්ය සටහනේ දැක්වෙන දර්ශකය කිසිඳු නිල ජාත්යන්තර වාර්තාවක් හෝ ආයතනයක් මගින් පළ කර නොමැත. කෙසේ නමුත් ශ්රී ලංකාව 2026 වසරේදී ආයෝජක සබඳතා සහ ණය විනිවිදභාවය වේගයෙන්ම වර්ධනය කරගත් රටවල් අතරින් සිව්වැනි ස්ථානයට පත්ව ඇත. මෙම IIF ආයෝජක සබඳතා සහ ණය විනිවිදභාවය පිළිබඳ ඇගයීම සිදු කරනු ලබන්නේ ලොව පුරා සිටින නැගී එන වෙළෙඳපොළවල් සහ සංවර්ධනය වෙමින් පවතින ආර්ථිකයන් 57ක් සඳහා පමණි. ඉහත සමාජ මාධ්ය සටහනේ දැක්වෙන ඇමරිකා එක්සත් ජනපදය, කැනඩාව, ජපානය, ෆින්ලන්තය, නෝර්වේ සහ ස්විට්සර්ලන්තය වැනි රටවල් ලෝකයේ දියුණු වෙළෙඳපොළවල් බැවින්, ඒවා මෙම 57 ලැයිස්තුවට අදාළ නොවේ.
එසේම, ඩිජිටල් මූල්ය සේවා සපයන Remitly ආයතනයේ 2026 ගෝලීය වාර්තාවට අනුව, පවුල් වශයෙන් පදිංචි වීම සඳහා ලොව හොඳම රටවල් අතර ශ්රී ලංකාව 4 වන ස්ථානයට පත්ව ඇත. කෙසේ නමුත් එම දර්ශකයද ඉහත සමාජ මාධ්ය සටහනෙහි දක්වා ඇති දර්ශකයට සමාන නොවේ. මීට අමතරව ලොව පොදුවේ පිළිගත් ප්රධාන ජාත්යන්තර සංවර්ධන දර්ශක ඔස්සේ සොයා බැලීමේදීද තහවුරු වන්නේ ශ්රී ලංකාව ඇමරිකාව, කැනඩාව, චීනය වැනි රටවල් සමග පිලිවෙලින් සිව්වැනි ස්ථානය හිමිකරගත් කිසිඳු නිල දර්ශකයක් නොමැති බවයි.
Title: ඇමරිකාව, චීනය, කැනඩාව සමග ශ්රී ලංකාව ලෝකයෙන්ම හතරවැනි තැනට පත් වුණාද ?
Fact Check By: B.P Hansani
Result: Misleading
