දිනපතා සත්ය කරුණු දැන ගැනීමට අපගේ WhatsApp චැනලයට මෙතනින් එකතුවන්න.
මෙරට රණවිරු සැමරුම් දිනට සමගාමීව උතුරේ සිදු කරනු ලැබූ කොටිත්රස්තවාදීන් සැමරුමක ඡායාරූපයක් ලෙස දක්වමින් “තබුත්තේගම කයිතං අවුරුදු 1 1/2 න් දුන් පුනරුදය” යනුවෙන් සඳහන් කරමින් ෆේස්බුක් ඔස්සේ ඡායාරූප සටහනක් හුවමාරු වූ අතර මේ පිළිබඳ අප සිදු කරන කරුණු විමර්ශනයක් මේ.
සමාජ මාධ්ය සටහන් (Social Media Posts) :
මෙම සටහන් සඳහා දක්වා ඇති ප්රතිචාර වලින් පෙනී යන්නේ මෙම ඡායාරූපයේ දැක්වෙන්නේ ලංකාවේ සිදු කළ සැමරීමක් බවට බොහෝ දෙනෙකු උපකල්පනය කර ඇති බවයි.
මෙය මෙරට සැමරුමක්ද යන්න පිළිබඳ සොයා බැලීමට අප පියවර ගනු ලැබුවේ මෙලෙසින්.
Fact-Check (කරුණු විමර්ශනය කිරීම) :
දශක තුනකට අධික කාලයක් පැවති ත්රස්තවාදය අවසන් කරමින් ලැබූ යුද ජයග්රහණය සමරමින්, යුද්ධයෙන් දිවිපිදු රණවිරුවන් අනුස්මරණය කෙරෙන 17 වන ජාතික රණවිරු සැමරුම් දින උත්සවය පසුගිය 19 වන දා පවත්වනු ලැබීය.
මේ අතර මුලතිව්, මුල්ලෙවයික්කාල් හිදී ත්රිවිධ හමුදාව සහ කොටි සංවිධානය අතර පැවැති අන්තිම සටනේදී මියගිය කොටි නායකයා ඇතුළු සාමාජිකයන් ද සාමාන්ය වැසියන් ද සිහිපත් කරමින් පසුගිය 18 වන දා උතුරේ ජනතාව එම දිනය සමරනු ලැබීය. ඒ සම්බන්ධයෙන් වාර්තා වූ ප්රධාන මාධ්ය ධාරා පුවතක් මෙතනින්.
2011 අගෝස්තු 29 දින නිකුත් කළ අංක 1721/2 දරන අතිවිශේෂ ගැසට් පත්රයෙන් LTTE සංවිධානය තහනම් සංවිධනයක් ලෙස නම් කර තිබෙනවා.
මෙමඟින් LTTE සංවිධානයේ සාමාජිකයෙකු වීම, නායකත්වය දීම, නිල ඇඳුම්, ලාංඡන හෝ කොඩි භාවිත කිරීම/ප්රදර්ශනය කිරීම, රැස්වීම් පැවැත්වීම සහ අරමුදල් සැපයීම ඇතුළු සියලුම ක්රියාකාරකම් ශ්රී ලංකාව තුළ මෙන්ම ශ්රී ලංකාවෙන් පිටතදී ද සිදු කිරීම සපුරා තහනම් කර තිබෙනවා.
එහි 4 වන වගන්තියේ සඳහන් වන්නේ එම නියෝග කඩකළ බවට බස්නාහිර පළාත් මහාධිකරණය විසින් තීන්දු කරනු ලැබුවහොත් අවුරුදු 20ක් දක්වා බන්ධනාගාරගත කිරීමකට යටත් වන බව ය.එවැනි වරදක් කිරීම සඳහා අනුබල දෙන හෝ ඊට තැත් කරන අයෙකුට වසර 10ක් දක්වා සිර දඬුවම් පැමිණ විය හැකි බව එහි වැඩිදුරටත් සඳහන්වනවා.
ඒ අනුව, මෙරට එල්.ටී.ටී.යි සංවිධානය තහනම් සංවිධානයක් වන බැවින් මෙලෙසින් එම සංවිධානයේ නිල ඇඳුම සහිතව දරුවෙකු සිටියා ද, යන්න අප පරීක්ෂා කරනු ලැබුවා. පසුගිය දා මුල්ලෙවයික්කාල් සැමරුමේ වීඩියෝ වෙත අපගේ අවදානය යොමු කළ අතර එහිදී දැක ගන්න ලැබුවේ, පහනක් දල්වමින් එම අනුස්මරණය සමරා ඇති බව ත්, කිසිදු අයුරකින් කොටි සංවිධානය නියෝජනය කරන ඡායාරූප, ඇඳුම් භාවිත කර නොමැති බවයි. එමෙන් ම එම අවස්ථාවට ශ්රී ලංකා හමුදා ආරක්ෂාව ද, යොදා ඇති බව දැක ගන්නට ලැබුණේ මෙලෙසින්.
එම අවස්ථාවේ තව ත් වීඩියෝ මෙතනින්, මෙතනින් සහ මෙතනින්.
මේ හේතුවෙන් අප ඉහත ඡායාරූපය Reverse Image සෙවුමක් සඳහා යොමු කරනු ලැබූ අතර එහිදී මෙම ඡායාරූපය Senthan guru (சேந்தன் குரு) නමැති X ගිණුමකපළ කර ඇති සටහනක් දැක ගන්නට ලැබුණා.
එහි සඳහන් කර තිබුණේ, “මාරයිමලෙයි නගර් හි මැයි 18 රැස්වීමේදී කාගේත් අවධානය දිනාගත් කුඩා කොටියා”( மறைமலை நகர் மே 18 கூட்டத்தில் அனைவரின் கவனத்தை ஈர்த்த குட்டிப்புலி)
සෙන්තන් ගුරු යනු කැපී පෙනෙන දේශපාලන චරිතයක් වන අතර සීමාන් නායකත්වය දරන නාම් තමිලර් කච්චි (NTK) පක්ෂයේ තොරතුරු තාක්ෂණ අංශයේ රාජ්ය නියෝජ්ය ලේකම්වරයා වේ. ඔහු තමිල්නාඩුව පුරා පක්ෂයේ ඩිජිටල් සහ බිම් මට්ටමේ ව්යාපාර සඳහා ප්රසිද්ධ හඬක් නගන සංවිධායකයෙකි.
එමෙන් ම මෙම x හි පළ කර තිබූ ඡායාරූපයේ දක්වා තිබුණේ, මාරයිමලෙයි නගර් හි මැයි 18 රැස්වීමේ ලබා ගත් ඡායාරූපයක් බවයි. ඒ අනුව ඔහුගේ එම ගිණුමේ පළ කර තිබූ තව ත් ඡායාරූප හා වීඩියෝ පරීක්ෂා කිරීමේදී මාරයිමලෙයි නගර් හි මේ වසරේ(2026) මැයි 18 පැවැත් වූ රැස්වීම වන්නේ, සීමාන් ප්රමුඛ NTK පක්ෂය විසින් ඉන්දියාවේ, තමිල්නාඩු ප්රාන්තයේ චෙංගල්පත්තු දිස්ත්රික්කයේ මාරයිමලෙයි සිදු කරන ලද LTTE අනුස්මරණ දිනය සිදු කළ රැස්වීම බව තහවුරු වේ.
ඉහත ඡායාරූපය පළ කර තිබූ සෙන්තන් ගුරු විසින් NTK නායක සීමාන්ගේ x පණිවිඩය නැවත සිය ගිණුමේ පළ කර තිබුණේ මෙලෙසින්.
එමෙන් ම සෙන්තන් ගුරු විසින් ඇඳ සිටි කළු පැහැති ඇඳුමින් ඔහු එම සැමරුම් තව ත් අවස්ථාවල දැක ගන්නට ලැබුණේ මෙලෙසින්, මෙලෙසින් සහ මෙලෙසින්.
LTTE නියෝජනය කරන ඇඳුමින් සැරසී සිටි එම දරුවා ඔසවා සිටින ඉහත ඡායාරූපය ඔහු සිය ෆේස්බුක් පිටුවේ ද, පළ කර තිබුණේ මේ අයුරින්.
ඒ අනුව පැහැදිලි වන්නේ, මෙරට උතුරේ ජනතාව විසින් යුද්ධයෙන් මියගිය දමිළ ජනතාව සහ LTTE මිය ගිය සාමාජිකයින් අනුස්මරණය කිරීමේදී LTTE නිරූපණය කෙරෙන අයුරුන් ඔවුන්ගේ නිල ඇඳුම දරුවෙක් ඇඳ සිටි බවට පළ වන ඡායාරූපය මෙරට ඡායාරූපයක් නොවන බවයි.
අපගේ කරුණු විමර්ශන පිළිබඳ තොරතුරු දැන ගැනීමට එක්වන්න
Facebook | Twitter | Instagram | Google News | TikTok | Youtube
Conclusion (අවසාන නිගමනය) :අපගේ විමර්ශනයෙන් පෙන්වා දෙන්නේ, මෙරට රණවිරු සැමරුම් දිනට සමගාමීව උතුරේ සිදු කරනු ලැබූ කොටිත්රස්තවාදීන් සැමරුමක දරුවෙකු විසින් LTTE ත්රස්ත සංවිධානය නියෝජනය කෙරෙන ඔවුන්ගේ නිල ඇඳුම ඇඳ සිටින බවට දක්වා තිබූ ඡායාරූපය මෙරට ඡායාරූපයක් නොව ඉන්දියාවේ තමිල්නාඩුවේ NTK පක්ෂය විසින් සංවිධානය කරන ලද මැයි 18 කොටි හිතෛෂී අනුස්මරණ රැස්වීමේ අවස්ථාවක එම පාක්ෂිකයෙකු විසින් ලබා ගත් ඡායාරූපයක් බවයි.
Title: LTTE සංවිධානය නියෝජනය කරමින්, එහි නිල ඇඳුම් අඳිමින් උතුරේ ජනයා මැයි 18 සැමරූ අයුරුද?
Written By: Pavithra Sandamali
Result: False
